സമയം - TIME

 എഫെസ്യർ 5 :16 "ഇത് ദുഷ്കാലം ആകയാൽ സമയം തക്കത്തിൽ ഉപയോഗിച്ചുകൊൾവിൻ".

നമ്മൾ ആയിരിക്കുന്നത് ദുഷ്കാലത്തിലാണോ? 

ഇന്ന് ചുറ്റും നടക്കുന്ന സംഭവങ്ങളെ ഒന്ന് വിലയിരുത്തിയാൽ അറിയാൻ സാധിക്കും. അനുദിനം കേൾക്കുന്ന സംഭവങ്ങൾ, പത്രവാർത്തകൾ, ഇവയെല്ലാം എങ്ങനെയുള്ളവ ആണ്?നമ്മൾ കേൾക്കാൻ ആഗ്രഹിക്കുന്ന വാർത്തകൾ വിരളം ആണ്.ഗാർഹിക പീഡനങ്ങൾ, കോവിഡ് വ്യാപനം, കൊച്ചുകുട്ടികളിൽ അടക്കം ഉള്ള ആത്മഹത്യകൾ സ്വന്തം കുടുംബത്തിൽ തന്നെയുള്ള കൊലപാതകങ്ങൾ അങ്ങനെയങ്ങനെ നീണ്ടു പോകുന്ന ഒരു വലിയ ലിസ്റ്റ്. രാജ്യത്തിന്റെയും സമൂഹത്തിന്റെയും  നെടുംതൂണുകൾ ആയ യുവജനങ്ങളെ സംബന്ധിച്ചു ആണെങ്കിൽ പഠനം മുടങ്ങി, ജോലി കാര്യങ്ങൾ അവതാളത്തിലായി, പരീക്ഷകൾ അടക്കം എല്ലാ കാര്യങ്ങളും വിർച്യുൽ പ്ലാറ്റഫോമിൽ ആയി. ഇടക്കൊക്കെ ആത്മീയമായി ഉണർവ് നൽകുന്ന യൂത്ത് മീറ്റിംഗുകളും സഭായോഗങ്ങളും എല്ലാം തന്നെ വിലക്കപ്പെട്ടിരിക്കുകയാണ്. ഈ സാഹചര്യത്തിൽ ഏകാന്തത എന്ന ഘട്ടത്തിലൂടെ കടന്നുപോകാത്തവർ ചുരുക്കം ആണ്. എല്ലാവരും  വീടുകളിൽ തന്നെ ആയിരിക്കുകയാണ്;തടസ്സമില്ലാത്ത ഇൻ്റർനെറ്റും ഒരു സ്മാർട്ട് ഗാഡ്‌ജറ്റും കയ്യിലുണ്ടെങ്കിൽ ജോലിയും പഠനവും എല്ലാം അതിൽ തന്നെ ലഭ്യം ആകുന്നു. എന്നാൽ മനുഷ്യൻ ഒരു സാമൂഹിക ജീവി ആയതിനാൽ തന്നെ സാമൂഹിക അകലം പാലിച്ചു ജീവിക്കുക എന്നത് വളരെ ബുദ്ധിമുട്ട് ഉണ്ടാക്കുന്നു.

ഇങ്ങനെ എല്ലാം ഉള്ള പ്രതികൂലങ്ങൾ ഉള്ളപ്പോൾ തന്നെ ഈ അവസ്ഥയിൽ നമുക്ക് കിട്ടിയ ഏറ്റവും വലിയ അനുഗ്രഹം എന്തെന്നാൽ സമയം എന്നതാണ്.സമയം എന്ന റിസോഴ്സ് ഫലപ്രദമായി ഉപയോഗിക്കുമ്പോൾ ജീവിതത്തിന്റെ എല്ലാ തലങ്ങളിലും മാറ്റം കണ്ടുതുടങ്ങാൻ സാധിക്കും.ബൈബിളിലെ ഉത്തമ ഉദാഹരണം ആണ് മോശെ, യിസ്രായേൽ മക്കളെ കനാനിൽ എത്തിക്കുന്നതിന് മുൻപ് ഉള്ള ട്രെയിനിങ് പീരീഡ് ആയിരുന്നു നീണ്ട 40 വർഷങ്ങൾ, യേശുക്രിസ്തുവിന്റെ 33 വർഷക്കാലത്തെ രഹസ്യജീവിതം.ഇതെല്ലം ദൈവവും ഒത്തുള്ള ക്വാളിറ്റി ടൈമിന്റെ പ്രാധാന്യതയെ കാണിക്കുന്നു. ഒതുങ്ങിയിരിക്കുന്ന കാലയളവ് എങ്ങനെ ഫലപ്രദം ആക്കാം എന്ന് ആലോചിക്കുക,സമയം പോലുള്ള റിസോഴ്സ് ഉപയോഗിക്കാൻ അറിയാവുന്നവനെ ദൈവം ബുദ്ധിമാൻ എന്ന് വിളിക്കുന്നു.

ലൂക്കോസ് 19 :11- 27  ൽ  കാണുന്ന ഉപമ ശ്രദ്ധിക്കുക; ഏല്ലാവർക്കും സുപരിചിതമായ ഈ ഉപമയിൽ പറഞ്ഞിരിക്കുന്നത് നല്കപ്പെട്ടിരിക്കുന്ന റിസോഴ്സ് എങ്ങനെ ഉപയോഗിച്ചു എന്നതിനെപ്പറ്റിയാണ്. അവർക്ക് നൽകപ്പെട്ടത് റാത്തൽ ആണെങ്കിൽ നമുക്ക് ഇന്ന് നല്കപ്പെട്ടിരിക്കുന്നത് സമയം ആണ്. ആകയാൽ ബുദ്ധിയുള്ള ദാസനെ എന്ന വിളിക്ക് യോഗ്യനാവാനായി നല്കപ്പെട്ടിരിക്കുന്നത് തക്കത്തിൽ  ഉപയോഗിച്ചുകൊൾക.

WRITER - SHIMONA 

THEME- TIME